الدنيا يا ابني يومين
لو بت ليله مدين
تصحي تكون داين
وداينت يا حلو زمان
واليوم بتداين
هانت عليك الناس
وفرحت بالغيرة
اهو جالك الحصاد
ومعدش فيها جناين
ويا طول الليل وسهره
والفكر والحيرة
جرحك على جرحه
دفه قصاد دفه
قهرك قصاد قهره
والمركبة ماشيه
واهو كله بالميزان
وذنوب بتتصفى
خدك قصاد خده
والكف نفس الشكل
دمعك على دمعه
والجفن تاعبنا
مفيش دواء نافع
ولاعدش ليك شافع
لو زرت مولانا
او جبت سيدنا
أطرش عايز يرقص
على صوت طبول الزفة
لا رقصته نفعت ولا
حتى كان عاجب
لا الحلوة شافت رقصه
ولا حتى رفعت حاجب
وما نابه غير تعبه
ودمه اللى اتصفى
والمركبة ماشييه
بدفه قصاد دفه
والبحر موجه عالي
والنار بتطفى
طب قولي يا مسكين
هتجري على حضن مين
من البرد تتدفي
بكره تعدي الأيام
وترسي مراكبنا
سبحانه الديان
لو حتى شيبنا
بيعدلنا الكفة
والمركبه ماشيه
بدفه قصاد دفه
وساعتها يا مسكين
هتجري على حضن مين
من البرد تتدفي
ما الدنيا يابني يومين
لو بت ليله مدين
تصحي تكون داين
وداينت يا حلو زمان
واليوم هتداين
